मायड़ भासा स्कूलां मं पढ़ाबा री मान्यता सूं राजस्थान युवा संघ मं हरख रो माहौल

सूरत। राजस्थान युवा संघ अर राजस्थान फाउंडेशन सूरत चेप्टर रै संयुक्त तत्वाधान मांय सुप्रीम कोर्ट द्वारा मायड़ भासा राजस्थानी नै स्कूलां मं पढ़ाबा री मान्यता मिलण रो समाचार आवतां ही राजस्थान युवा संघ कार्यालय मं विशेष बैठक रो आयोजन करायो गयो।
ईं अवसर पर समाजबंधुआं अर युवा कार्यकर्तायां मं घणो हरख रो माहौल देखबा नै मिल्यो। सगळायां ए एक-दूजा नै बधाइयाँ दी अर गुड़ खिलाकर खुशीयां मनाई।
बैठक मं मायड़ भासा राजस्थानी रा संरक्षण, प्रचार-प्रसार अर नई पीढ़ी तांई भासा पहुंचावण बाबत विस्तार सूं चर्चा करी गई। रामावतार पारीक ए कह्यो कै राजस्थानी भासा म्हारी संस्कृति, परंपरा अर अस्मिता री साची पिछाण है। सुप्रीम कोर्ट सूं मिलेली आ मान्यता सगळा राजस्थानियां खातर गर्व अर गौरव रो विषय है।
संघ रा पदाधिकारी अर कार्यकर्तायां ए संकल्प लियो कै मायड़ भासा नै घर-घर पुगावण अर युवा पीढ़ी मं राजस्थानी भासा रो प्रेम जागृत करबा खातर समय-समय पर सांस्कृतिक अर सामाजिक कार्यक्रम आयोजित करया जासै। बेगा ई मायड़ भासा रा प्रचार-प्रसार खातर भव्य राजस्थानी कवि सम्मेलन रो आयोजन करायो जावेलो।
बैठक दौरान समाजबंधुआं ए एक सुर मं उद्घोष कर्यो —
✨ “आपणी भासा, आपणो मान — जय जय राजस्थान” ✨
ईं अवसर पर किशोर सिंह शेखावत, योगेन्द्र शर्मा, जगदीश शर्मा, राजेंद्र चौधरी, विनोद सारस्वत, पंकज शर्मा, मनोज वैष्णव, राजू शर्मा, महेंद्र चौधरी, प्रमोद शर्मा अर अन्य कार्यकर्ता मौजूद रया।